Zemabawka All NGO Coordination-ten Zemabawka LC pahnih indantir duh lo

Zemabawk All NGO Coordi-nation Committee chuan, Aizawl Municipal Corporation (AMC) Board of Corporator-in December 16, 2022-a an ṭhutkhawmah Zemabawk Local Council aṭanga Zemabawk East Local Council leh Zemabawk West Local Council din dilna an pawm chu an duh loh thu an tarlang a; boruak chhe zawk a thlen loh nan tipuitling lo turin Chief Minister leh Aizawl Mayor an ngen.

Zemabawk All NGO CC chuan, tun dinhmunah Zemabawkin LC sorkar a neih loh thu an tarlang a, "Zemabawk hi administrator thuhnuaia awm mek kan ni. Khawtlang roreltu mumal kan neih loh laia hetiang thil lian tham leh pawimawh chungchanga AMC-in thuthlukna a siam hi thil kalphung niin a lang lo a, LC thar siam/piantir hi kan remti lo a ni," an ti.

Zemabawk LC aṭanga Zemabawk East leh Zemabawk West LC siam/piantir chungchangah Zemabawk LC administrator leh mipui ráwn an ni lo chu veng mipui zahlohna leh palzûtna a nih thu tarlangin NGO-te chuan, "Kan duh dan leh ngaihdante vawi thum zet CM leh Mayor hnenah ziakin kan thlen tawh a, anmahni ngei hmuin, ṭawngkaa sawipui an nih hnu pawhin ngaih pawimawh a hlawh lo a, LC thar siam tura thutlukna sût leh a awm tak loh avangin thuziak leh ṭawngka mai lo deuha chet chhuah hun a thleng dawn niin a lang," an ti a; boruak chhe zawk a thlen hmain NGO-te ngenna ngaih pawimawh turin an chah a ni.

Zemabawk NGO-te chuan, August 22, 2022-ah Zemabawk LC aṭangin Zemabawk South LC indantir a nih thu tarlangin, chutah chuan Zemabawk LC leh All NGO Committee duh dan angin ramri siam a nih loh thu leh ramri chungchang AMC Mayor leh Ward VII Corporator hnenah thlen tawh mah se, tun thlengin siamṭhat a la nih loh thu an tarlang bawk.