Aizawl khawpuia veng 28 velah gas home delivery kalpui a ni tawh

Aizawl leh district khawpuiah LPG consumer-te ina December 1, 2022 aṭanga eirawngbawlna gas pek (home delivery) kalpui a nih hnuah nimin thleng khan Aizawlah chuan veng 28 velah kalpui a ni tawh.

Hetih lai hian, sorkar hotute chuan, Aizawl veng tinah LPG home delivery kalpui vek tura hmalaknain hun a la duh rei dawn avangin distribution point-a sem la kalpui zel rih a nih thu an sawi.

Tarlan tawh angin, gas home delivery kalpui leh distribution point-a sem tihtawp chungchangah hian Food, Civil Supplies & Consumer Affairs (FCSCA) Secretary chuan hriattirna a tichhuak a, Aizawl khawpui leh district headquarters-ah December 1, 2022 aṭangin LPG distributor-te'n home delivery an kalpui ngei a ngaih tawh thu te, refill booking titute hnenah chauh gas pek tur a nih thu te, consumer-te chu refill booking ti ṭheuh tur leh home delivery kalpuina huam chhungah common point delivery tih tawh loh tur a nih thute a tarlang.

Vanglaini palai zawhna chhángin FCSCA hotute chuan, tun dinhmunah Aizawla veng 85 zinga 28-ah gas distributor-te'n home delivery an kalpui tawh thu an sawi a, "Veng tina home delivery kalpui hi duhthusam ni mah se, mipui lam leh gas distributor lamte duhthusamin an la inpeih lo a, mipuiin gas an nghei kan hlauh bawk si avangin distribution point/common point deliver-a gas sem hi kan la kalpui rih," an ti.

FCSCA hotute chuan, Aizawl khawpuia home delivery an kalpui tawhna veng 28 vel zinga veng pali velah chauh 100%-in home delivery kalpui a la nih thu an sawi a, "Heng vengahte hian distribution point/common point deliver-a gas sem tihtawp a ni tawh a, mipuiin an mamawh hunah online hmangin home delivery turin gas an chah ṭhin," an ti a; veng pum anga home delivery la kalpui lohnaah pawh online-a in register tawh leh gas refill booking ti an awm chuan mi pakhat chauh pawh ni se home delivery chu kalpui tur a nih thu an sawi.

Home delivery kalpui vek turin harsatna a la awm thu sawiin FCSCA hotute chuan, "Hun kha leh chen distribution point/common point deliver-a gas sem a nih avangin gas distributor leh mipui tam zawk an la in peih mumal lo. Mipui lamah online-a inziak lut thiam lo eng emaw zat an la awm a, distributor lam pawh delivery boy leh thawktu dang lâk belh leh hmanrua tihchangtlun an la ngaih avangin home delivery hi chak taka kalpui theih a ni lo a, hun a la duh rei deuh mai thei,"

an ti a ni.