Airtel-in April 2023 chhungin district khawpui tinah 5G pek hman inbeisei

Governor Hari Babu Kambhampati chuan nimin khan Raj Bhavan-ah Bharti Airtel Ltd zonal officer leh engineer-te a kâwm. Airtel hotute chuan, April thla chhungin district headquarters tinah 5G service pek hman an inbeisei thu an sawi.

Airtel hotute chuan, tun hnaia an hmalakna lian ber chu India hmarchhak biala a palina ni turin internet pek chhuahna network chak ber chi 5G network chu kumin February-ah hman theih turin an in-puahchah mek tih an sawi a, "5G network hi Aizawl leh Lungleiah hman ṭan a ni dawn a, Aizawl hmun lûn leh pawimawh lai leh sumdawnna hmunah tower 53 leh Lungleiah tower 10 bun hmasak a ni dawn. April 2023 thla chhungin district headquarters tinah 5G service pek hman kan inbeisei," an ti.

Dr Hari Babu Kambhampati chuan, Mizoramah Airtel hmalakna a ṭha thawkhata a hriat thu sawiin, "Internet network chak zawk hian zirna, hriselna leh banking-ah hmasawnna a thlen ngei dawn a, 5G network ṭangkaina tur pawh thil dang tam takah a awm," a ti.

Aizawl leh Lunglei khawpui bakah, district khawpui dang leh thingtlang khaw lian deuhahte 5G network leh fibre network siam belh zel tura Airtel hotute chahin Larsap chuan, "Thingtlang leh hmun kilkhawrahte internet a chhiat avangin bank service a ṭha thei lo a, customer-te'n harsatna an tâwk mek a ni," a ti a, mipui harsatnate chu telecom service provider-te'n an ngaihven thuai a ṭul thu a sawi.

Thingtlangah fibre thlun belh an tum thu te, tower bun chungchangah mipui zirtir a la ngaih thu te, thingtlang lamah VC-te'n an thlawp ṭhat thute Airtel hotute chuan an sawi bawk.