KHAWTHLIR

Him tâwkah ngai
Health department chuan phai aṭanga lâk luh buhfai chi khat, SURAJ (Premium Grader Rice) chu mihring ei atan a him tâwk tih an tarlang. Mizoram hmun hrang hrangah rinhlelhna leh khapna hial tihchhuah a nih avangin Food & Drugs Control Administration chuan buhfai chu an endiktir thu tarlangin, "Endikna hrang hrang aṭangin mihring ei atan a him tâwk a, danin ei tlâkah a pawm a, mipui hnenah ei atan a him tâwk a ni tih kan hriattir e," an ti.

Leiminin mi 3 a chhilh hlum
NHIDCL hnuaia Balaji company-in Neihdawn khaw kawng an laih mekah January 26, Ningani zan dar 7:30 vel khan Khawzawl Hermon Veng dáiah kawng chhak lam a min a, hna thawka awm hnam dang pathum a chhilh hlum.
Thu dawn danin, mitthite hi West Bengal-a Malda district-a mite an ni a; Raten Mandal (20), Alok Mandal (26) leh Prem Kumar Mandal-te an ni. Hna thawka awm ve dang mi pakhat erawh chu a tlànchhiat hman avangin a him thung.

Truck chesualah thi
Nimin chawhma dar 10 vel khan Tlangpui kawngah kawng siam hna thawktu contractor lirthei, GSB phur truck chu Tuipui leh Biate inkarah a chesual a, chetsualna hmunah truck khalhtu Lalhriatenga (35 vel) s/o Hmingthanzauva, Keiṭum khua a thi. Mi dang pakhat chuang ve erawh chu a hliam na lutuk lo nia thu dawn a ni.

Inbuatsaihna enpui
Lengteng bialtu MLA Dr L Thangmawia chuan nimin khan a bial chhung, Ngopa khua khelmuala KṬP General Conference 2024 thlenna tura inbuatsaihna a enpui. Ngopa Presbyterian Kohhran Hall-ah Organising Committee, sorkar department, village council leh tlawmngai pawl hrang hrang hruaitute nen an inkâwm a ni.

IASE-ah training
Institute of Advanced Studies in Education (IASE), Republic Veng Local Council leh YMA ṭangkawp chuan nimin khan IASE-ah Republic Venga sorkar, kohhran leh mimal sikul zirtirtute tan training an buatsaih a, Republic Veng LC chairman Lalengmawii'n a hawng. Training-ah hian Republic Venga sikul pangaa zirtirtute an tel a ni.