Aizawl Day lawm nan cheng nuai 60 dah

Aizawl Day Organising Committee chuan nimin khan Aizawl Press Club-ah thuthar thehdarhtute an kâwm a; February 21-25, 2023 chhungin Aizawl Day lawm a ni dawn a, chuta tan chuan cheng nuai 60 ruahman a nih thu an sawi.

Organising Committee chairman Laltlanzova Khiangte, AMC executive corporator chuan, Aizawl Day lawmna atan budget-ah cheng nuai 50 dah a nih thu leh thlavenga dah nen a vaiin cheng nuai 60 ruahman a nih thu a sawi a, "Aizawl khawpuia chengte leh thingtlang lama cheng kan unaute pawh Aizawl Day kan hman turah hian neitu thinlung pua phûr taka lo tel vek turin kan sáwm a ni," a ti a; Aizawl Day logo a tlangzarh nghal.

Aizawl Municipal Corporation (AMC) chuan executive corporator Laltlanzova Khiangte kaihhruai Aizawl Day Organising Committee a din a, Organising Committee hnuaiah hian sub-committee hrang hrang - Football Tournament Committee, Cleanliness Competition Committee, Information & Publicity Committee, Beat Contest Committee, Carnival Committee, Cultural Committee, Stall & Exhibition Committee, Souvenir & Conclave Committee-te din a ni.

Aizawl Day lawmna atan hian AMC ward 19-te tan faina lama inelna, cleanliness competition buatsaih a ni dawn a, February 8-16, 2023 chhungin veng hrang hrang endik a ni ang.

Beat contest-a tel tumte tan February 11, 2023 thleng phone number 9862519779-ah Telegram kaltlangin demo live video pakhat thehluh tur a ni a, tel turte'n AMC ward chhungah vote an neih a ngai. Band lâr sa leh hlun tawh tan tel theih a ni lo.

Aizawl Day chibai bûkna Aizawl veng 15-ah tàr tum a ni a; hmun lûn lai pathumah hoarding tàr tum a ni. Car flag, pamphlet leh souvenir siam tum a ni bawk.