MPF President mawhphurhna inhlân

Mizoram People Forum (MPF) chuan nimin kha Synod Office-ah president mawhphurhna inhlanna hun an hmang. MPF president kal chhuak Rev. Dr Vanlalnghaka Ralte-in president thar Rev. Dr C Chawnghmingliana hnenah president mawhphurhna a hlân a, MPF a kaihhruaina turah tlin tak leh ṭha taka thawk turin duhsakna a hlân bawk.

MPF din tirh aṭangin president mawhphurhna hi Synod moderator apiangin an chelh ṭhin a, president thar Rev. Dr C Chawnghmingliana pawh Synod moderator ni mek a ni. MPF secretary pawh a term a zawh avangin secretary ni lai Prof. Malsawmliana chu term thar atan nimin vêk khan ruat thar leh a ni a; amah hi Central YMA assistant secretary ni lai a ni.

MPF President chuan, inthlanna thianghlim a awm theihna tur leh sorkar ṭha a awm theihna tura MPF hruaitute'n hma an lo lak tawhna a ngaihhlut thu a sawi a, "MPF hmalaknaah inpumkhatna leh thawhhona ṭha a pawimawh," a ti a; kohhran leh tlawmngai páwl hrang hrangte lungrual leh pumkhat taka an thawh chuan ramin hma a sawn zel tur thu a sawi.

Rev. Dr C Chawnghmingliana chuan, MPF chu politics-a ṭan lam nei lo, lái taka kal tur an nih thu sawiin, "MPF-a tel pawl leh member-te'n ṭan lam neia kan kal hlauh chuan kan tum ram kan hlen thei dawn lo a, a lai taka kal thei zel turin kan inbuatsaih a ngai a ni," a ti.

MPF-ah hian kohhran leh pawl hrang hrang 11 an awm mek a; chu'ngte chu - Mizoram Presby-terian Kohhran, Roman Catholic, Evangelical Church of Maraland, Lairam Isua Krista Baptist Kohhran, Evangelical Free Church of India, Wesleyan Methodist Church, Central YMA, MUP, MHIP, Mara Thythlia Py (MTP) leh Young Lai Association (YLA)-te an ni.