Children's Science Congress 2023-ah Mizoram aṭangin child scientist 8 an tel

India ram pum huapa science lama inkhawmpui lian, National Children's Science Congress vawi 30-na chu nimin khan Science City, Ahmedabad, Gujarat-ah ṭan a ni a, Mizoram aṭangin zirlai pariat leh anmahni hruaitu mi panga an tel.

National Children's Science Congress 2023 (NCSC) hi nimin zing dar 8 khan ṭan niin, state hrang hrang aṭanga telte chuan mahni hnam thuam inbelin 'Science kawngzawh' an nei a; nimin chawhnu lam aṭang khan project presentation hun hman niin, child scientist-te'n an thil zirbingte an sawifiah. Inkhawmpui hi January 31 thleng neih a ni ang.

Kumina NCSC-ah hian Science Teacher's Association, Mizoram (STAM) tirhin child scientist pariat an tel a; mi panga - Joel Lalbiakkima, scientific officer, MISTIC, Mizo H/S-a zirtirtu H Lalrinawmi, Saitual H/S-a zirtirtu Grace Lalawmpuii Sailo, Mamit M/S-II-a zirtirtu Lalsangpuii leh Ruantlang H/S-a zirtirtu R Lalsiamliana ten an hruai a ni.

NCSC 2023-a telte hian January 26, Ningani khan Indian Institute of Technology, Gandhinagar an tlawh a ni.