CYMA leh MTP inkâwm

Nimin chawhma khan Central YMA hruaitute leh Mara Thyutlia Py (MTP) hruaitute CYMA Office-ah an inkâwm a; Mizorama tlawmngai pawl lian YMA, MTP leh YLA (Young Lai Association)-te Mizo hnam inpumkhatna atana an thawhho dan tur an sawiho.

Inkawmna hi CYMA president R Lalngheta'n a kaihruai a, MTP aṭangin assistant secretary N Solomon Beihlothe leh adviser leh hruaitu dangte an tel. R Lalngheta chuan, thawhhona leh hnam inpumkhatna ṭha a awm a pawimawh thu sawiin, "Inpumkhatna a awm loh chuan Mizo hnam dinchhuahna tak tak a awm thei lo," a ti a; YMA CEC ṭhutkhawm hnuhnung berah YLA hruaitute nen inkawmhona neih ni se, tia an rel thu a sawi.

Mizo hnam inpumkhatna atan YMA, MTP leh YLA-te an thawhho a ṭul thu an sawi a; Zo hnahthlak hnam hrang hrangte ṭawng vawnhim a ṭul thu leh inpumkhatna atan ṭawng tualléng Mizo ṭawng hman uar a ṭul thu te, ram leh hnam humhalh nan kawng hrang hrangah thawhho a ṭul thu te, ram hmasawnna hnathawh enpui chungchangah inthuruala hmalak a ṭul thute an sawi bawk.

Hun remchangah kokim zawkin, YMA, MTP leh YLA hruaitute inkawmho a, thawhhona siam dan kawng zawn ni se, tiin thu an dah a ni.

CYMA, MTP leh CYLA hruaitute chuan kum 1998, 2004, 2006 leh 2016-ahte inkawmhona leh thawhhona an lo siam tawh a; kum 2016 khan Lammualah Joint Cultural Meet an lo hmangho tawh bawk.