CM leh G20 Coordinator an inkâwm

Chief minister Zoramthanga leh G20 Meeting chief coordinator Harsh Vardhan Shringla leh a hote chu January 28, Inrinni khan CMO Cabinet Meeting room-ah an inkâwm a; March 2, 2023-a Aizawla G20 Business Meeting neih tura inbuasaihna leh hmachhawpte an sawiho.

Inkawmhonaah hian sorkar laipui aiawhte chuan, state dangin G20 meeting atana an inpuahchah dan leh an thlen tawh dante sawiin, Mizoram aṭanga an beisei leh ngaih pawimawh tura an duhte an sawi a ni.

G20 Meeting chu meeting neihna tur khawpuite cheibàwlna leh tihchangtlunna atan remchangah lâk a, ruahmanna siam ṭha an tih thu an sawi a; hnam ziarâng pho chhuak a, mahni state ṭheuh hmasawn theihna turte tarlan thiam a pawimawh thu an sawi bawk.

CM Zoramthanga chuan, Mizoramin G20 Business Meeting a theng tur chu a lawm thu a sawi a, "India ram state tam tak uluk taka min zir chian hnua Mizoramin hetiang hun pawimawh thleng ve thei tura min thlang hi a ropui khawp mai," a ti.

Sorkar thuchhuah tarlan danin, Group of Twenty (G20) hi khawvel economy hmasawn zelna tur leh inrêlbàwlna atana ram hrang hrang intêlkhawmna pawl a ni. G20 ramte Gross Domestic Product (GDP) belh khawm chu khawvel pum GDP-ah 85% a tling; khawvel puma insumdawn tawnna zinga 75% chu G20 rama thleng a ni a, khawvela mihring zawng zawng hmun thuma ṭhena hmun hnih (66%) vel chu G20 rama mi an ni.

G20 member ramte chu kum tin president nihna an inchan chhâwk ṭhin a, kumin hi India ramin president a chelh kum a ni a, December 1, 2022 khan president ni ṭanin, November 30, 2023 thleng president a ni dawn. India ram khawpui hrang hrangah G20 meeting neih a ni dawn a, meeting pui ber G20 Summit chu September thlaah New Delhi-ah neih a ni ang.

Aizawlah pawh March 2, 2023 khian G20 Business Meeting neih tura ruahman niin, B20 tia sawi a ni a; multilateral business partnership session-a hman tur a ni.