KHAWTHLIR

Thisen pe
January 28, Inrinni khan KṬP, Lungleng-I Bial chuan ZMC tan thisen unit 54 an pe a, petute mipa 38 leh hmeichhia 16 an ni. KṬP, Zuangtui Bialin Synod Hospital tan thisen unit 40 pein, petute mipa 32 leh hmeichhia pariat an ni a; KṬP, Ramhlun Vengchhak Branch pawhin Civil Hospital, Aizawl tan unit 23 an pe a, petute mipa 16 leh hmeichhia pasarih an ni. Adventist Youth Federation, Champhai North pawhin Champhai District Hospital-ah thisen unit 40 an pe a, petute mipa 36 leh hmeichhia pali an ni.

ACCJSU Assembly
Aizawla college hrang hranga students' union-te intèl khawmna, Aizawl City College Joint Students' Union (ACCJSU) chuan January 28, Inrinni khan Bawngkawn South YMA Hall-ah Assembly cum Election an hmang a, MLA Lalrindika Ralte-in a hmanpui. Inkhawmpuiah hian Aizawla college 10-a SU hruaitute an tel a, kum 2023 chhunga office bearer turte an thlang a ni.

PYD inkhawmpui
UPC (NEI) hnuaia Aizawl East District leh North Mizoram District-a pastor bial hrang hrangah January 27, 2023 zan aṭang khan bial PYD inkhawmpui an hmang a, nizan khan a ṭiak. Inkhawmpuiah hian Inrinni chhunah khan rorel a ni. PYD statistic-a a lan danin, Aizawl East District-a tualchhung kohhran 133-ah PYD member 7,320 leh North Mizoram District-a tualchhung kohhran 146-ah PYD member 7,032 an awm a ni.

Nuthlawi Lungleng
Suzzane Sainghinglovi Sailo lehkhabu buatsaih, 'Nuthlawi lungleng' tih chu January 28, Inrinni khan Lalremsangi Fanai-in Aizawl Press Club-ah a tlangzarh.

Heroin man
Champhai police-te chuan January 27, 2023 khan Lalthawmluaia (33) s/o Hrangkianloa, Sindihai, Myanmar, tuna Zokhawthara khawsa mek nia inchhál hnen aṭangin heroin gram 279 (hawng 22) an man. Ruihhlo hi international market-ah cheng nuai 139 hû a ni a, Champhai Police Station-ah thubuai ziah luh a ni.