Hmun hnihah kuhva rah man a ni

Kuhva Chingtu Cooperative Society, Bilkhawthlir (KCCSB) duty-te chuan January 27, Zirtawpni zan zanlai pelh hret khan Myanmar aṭanga dan loa kuhva rah lak luh nia hriat ip 70-80 vel an man a, hâl nghal a ni. Kolasib police pawhin January 27 khan Kolasib Rengtekawna check gate-ah lirthei pakhat aṭangin kuhva rah ip 39 (kg. 3,120) an man bawk.

Police-in January 27-a kuhva rah ip 39 an mante chu Gharmurra, Assam-a phurh thlen tur nia hriat a ni a, a kaihhnawih dangte chhui mek a ni. Kuhva phurhna lirthei khalhtu Salek Uddin Talukdar (29) leh kuhva neitu Rohim Uddin Barbhuiya (39), Hailakandi district, Assam nia inchhálte pawh man nghal an ni a, an lakah Kolasib Police Station-ah thubuai ziah luh a ni.

KCCSB hruaitute hnen aṭanga thu dawn danin, KCCSB duty-te hian January 27, Zirtawpni zan zanlai pelh hnu, dar 12:30 (January 28) velah Vairengte lam aṭanga Kolasib lam pana tlân tipper, TR-01 AT-1512 chu ringhlelin an endik a, kuhva rah ro tam tham tak an hmu chhuak a, an man nghal a ni. Tipper chu kuhva phurhna atan bik siam danglam a ni a, a chhuat chu a chhâwnga siam a nih thu an sawi.

Tipper khalhtu, Hussein inti, Silchar lam mi nia insawi chuan, Vairengte aṭangin Mizote nen an chuan chhoh thu leh gate thlen hma deuhah Mizote chuan gate chingfel tur anga insawiin an chhuksan thu a sawi. Hussein pawh hi Mizote chu ko tur anga insawiin a kal sawn a, a tlanbo ve nghal bawk.

Vahan aṭanga a lan danin, tipper neitu chu Nabazit Banik, West Tripura lam mi a ni a; kuhva rahte chu ipah dah loin, lirthei chhuatah dah tawp a nih avangin a zat chiah hriat theih a ni lo a, KCCSB hruaitute chuan ip 70-80 inkar vel a nih an ring. Kuhvate hi tipper aṭanga hlàn thlâk a nih hnuah hâl nghal a ni.

KCCSB-te hi dan loa kuhva tawlh rûk tihtawp a nih theih nan December 14, 2022 aṭangin chhun zan zawmin Bilkhawthlir dáiah an duty a, kuhva phur nia an rinhlelh lirtheite an enfiah ṭhin. Nikum December 14 aṭanga nimin thleng khan kuhva rah ip 500 vel an man tawh a ni.

Hetih lai hian, Vai­rengtea kuhva chíngtute pawlte chuan Vairengte chhehvela kudam neitute chu tun January thla ral hma ngeiin an kudama kuhva dahte senghawi vek turin an hriattir a, hun tiam a ral chuan a theih ang anga hmalak an tum nia thu dawn a ni.