Sahuanah sakei 2 dalh belh tum a ni Thla 9 chhungin Rs 7,53,700 an hmu

Sorkar kum 2022-23 kal mekah April 1 aṭanga December 31, 2022 chhung khan Aizawl Sahuan (Zoological Park) chuan Rs 7,53,700 a hmu. February 6, 2023 khian Aizawl Sahuanah sakei pahnih dalh belh tur lâk tum a ni.

Aizawl Zoological Park hi April 1 - December 31, 2022 chhung khan mi 43,901-in an tlawh a, two wheeler 6,793, LMV 3,227, HMV 141 bakah, still camera 114 leh video camera pakhat ken luh leh dah man an lâkte aṭangin Rs 7,53,700 an hmu a ni.

Zoological Park enkawltute chuan, February 6, 2023 khian Nandankanan Zoological Park, Odisha aṭangin Aizawl Sahuana dah tur sakei, a nu leh a pa pakhat ve ve lâk tum a nih thu Vanglaini an hrilh a, "Central Zoo Authority aṭangin phalna kan hmu tawh a, February 6, 2023-a zuk la turin tunah hian Mizoram sorkarah pawisa kan dil mek," an ti.

Sakei an lâk thar tur pahnih chu an la naupan thu sawiin Sahuan enkawl­-tute chuan, "Tuna Sahuana sakei kan neih mek hi kum 15 vel a ni tawh a, a upa ṭan tawh. Kan lak thar tur hi kum 5 ve ve an ni," an ti a; an awmna tur hmun an siam zawh thawkhat tawh thu an sawi.

Tun hnaia social media hrang hranga Aizawl Sahuana sakei a chêr nia sawi chungchanga zawhna chhángin Sahuan enkawltute chuan, "Kan sakei enkawl lai hi a upa tawh a, hman níah a awmna hmun kan siamṭhat avangin kar khat vel a inah kan khung a, khatih lai khan chaw a ei ṭha duh lo. Ni tin bawng sa kan pe a, frozen a ei duh loh avangin a tharlám zel kan pe," an ti.

Sakei awmna hmun an siamṭhat zawh tawh avangin an chhuah leh tawh thu leh pangngai takin chaw a ei an beisei tawh thu te, sakeiin hrisel lohna a neih àwm an hriat loh thu te, anmahni thua sakei chaw an thlak emaw, tihbelh emaw theih loh avangin sorkarah kel sa pek tel an dil mek thu te, vety doctor-in chawlhkar tin Thawhlehni leh Zirtawpni apiangin a tlawh thute an sawi bawk.