Intodelh inzirtirna hun zirlaite hmanpui

Aizawl North-II bial­tu MLA Dr Vanlal­thlana chuan Tharthilthlentu (TiLi) Entrepreneurship Mindset Curriculum (TEMC) nen ṭang dunin a biala high school pahnih - Hrangchhuana H/S leh Republic H/S zirlaite tan intodelh zirtirna an buatsaih a, January 28, Inrinni khan zoin, TiLi office-ah khârna inkhawm an hmang.

Intodelh inzirtirnaah hian, intodelh chung­chang zirtir turin Indian Institute of Management (IIM) aṭanga zir chhuak mithiamte leh sum­dawnnaa tawnhriat nei ṭhate rawih an ni a, chawlhkar tin sikul pahnih­ah hian ṭum hnih hun hman ṭhin a ni.

Zirlaite chu intodelh thei turin kawng chi hrang hranga hrual an nih bakah, hlawm 26-ah ṭhenin, Rs 2,000 ṭheuh pek an ni a, an sum dawnte peipun dan leh kalpui danah intihsiak an buatsaih a ni. Intihsiakah hian a ti ṭha ber group hnenah Rs 10,000, pahnihna hnenah Rs 5,000 leh pathumna hnenah Rs 3,000 pek a ni.