Kum 4 hnuah chhungkaw tlemtê hnenah Rs 25,000 an pe thei ṭâwk - BJP President

BJP, Mizoram Pradesh president Vanlalhmuaka chuan, CM Zoramthanga'n SEDP-ah Rs 3,00,000 pek a tiam laiin, kum 4 an sorkar hnuah pawh chhungkaw tlemtê hnenah Rs 25,000 an pe thei ṭâwk tih a sawi a; kumina inthlanpuiah Mamit bialtuah BJP-in MLA an neih ngei a rin thu a sawi bawk.

Vanlalhmuaka hian January 28, Inrinni khan Mamit Bazara vantlang inkhawmah thu sawiin, Mizoram state a nih hnua Congress leh MNF party-te'n sorkarna an chan chhungin manifesto an inziah ṭhatsiak a, manifesto angin hma an la tak tak ngai lo niin a sawi a, "CM Pu Zoramthanga'n SEDP cheng nuai 3 aia tlem lo in dawng dawn a tih hi kum 4 an sorkar tawh a, nuai 3 dawng an awm lo a, chhungkaw tlemtê hnenah Rs 25,000 an pe ṭâwk a ni," a ti.

BJP President chuan, "BJP chuan inthlan dawna mipui hmaa manifesto a neihte chu sorkarna a chan veleh tipuitling turin kawng hrang hrangin hmalak a ni ṭhin a, manifesto kha mipuiin min thlan chhan a nih avangin tipuitling turin hmalak a ni ṭhin," a ti a; BJP chu an intiam anga kal ṭhin an nih avangin kumina inthlanpuiah BJP chu Mamit bialtu MLA neitu an nih ngei a rin thu a sawi.

Mamit district mai ni lo, Mizoram pum hmasawn nan leh retheihna lak aṭanga chhanchhuah an nih theih nan BJP an sorkar a ngaih thu sawiin Vanlalhmuaka chuan, "Mamit district-in BJP MLA kan nei a nih chuan Aspirational District kan bye bye tawh dawn a ni," a ti.