Tuirial lui túr hmanga hrâi a nih avangin SMR-in police-ah FIR thehluh an tum

Tuirial lui hnár lama nungchate tûra hrai a nia hriat a nih avangin January 28, Inrinni khan Aibawka EFCC department hotu te, Save Mizoram River (SMR) hruaitute leh Muallungthu VC-te'n an endik a; vawiin hian SMR-in police-ah first information report (FIR) thehluh an tum.

SMR hruaitute hnen aṭanga thu dawn danin, Tuirial luia nungchate an hrâina hmun hi Phulpui ram leh Baktawng ram inkar velah a ni a, tûr phul hun tak hriat a ni lo a, January 21, 2023 zingah tura hrai a ni tih hriat a nih avangin, January 20, 2023 tlai/zan vela hrài a nih rin a ni.

Inrinnia an en­diknaah hian, riahbûk bulah bleaching powder ip ruak pali leh chinai ip pahnih hmuh a ni a, luia an phulna hmunah bleaching powder leh chinai êk chhia hmuh tur tam tak a awm. Bleaching powder leh chinai phulna aṭanga lui mawng lam km. 1 vel thlengin luia nungcha thi hmuh tur eng emaw zat a awm a ni.