EFCC department golden jubilee lawm

Environment, Forests & Climate Change (EFCC) department chuan January 28, Inrinni khan an department kum 50-na Forest Training School, Bethlehem Vengthlangah an lawm a, EFCC minister TJ Lalnuntluanga'n hmanpuiin, Golden Jubilee Excellence Award a sem.

Kum 1972-a union territory-a Mizoram hlàn kài a nih khan Forest department hi department puitlingah dah a ni a; kum 1987 khan Forest department tih chu Environment & Forest department tia thlak niin, kum 2016 khan Environment, Forest and Climate Change department tia thlak leh a ni.

Minister TJ Lalnuntluanga chuan, Mizorama thing leh mau leh nungchate humhalhnaah EFCC department a pawimawh thu a sawi a, "Kan hmalaknaah mipui ngai pawimawha a tam thei ang ber mipui nen kan thawhho thiam a pawimawh. EFCC department chuan agro forestry lamah hma a la chhoh zel a, hei hi loneimite'n department an hlâwkpui zelna tur a ni," a ti.

Jubilee lawmnnah hian Minister chuan EFCC department-a field staff thawk ṭha zual mi pali hnenah Golden Jubilee Excellence Award a hlan a; principal chief conservator of forests RK Singh-a'n thu a sawi bawk.

EFCC department kum 50 tlin lawmna atan January 27, 2023 khan Jubilee Green Rally buatsaih a ni a, department mi leh sate bakah, YMA-te leh ram leh nungcha humhalhna lama inhmang pawlte an tel a ni.