Silsury-ah BSF laka lungawi lohna lantir

Silsury khaw mipuite chuan Border Secusity Force (BSF)-te'n an khaw mite an tihnawmnaha an tihduhdah ṭhin an duh lohzia lantir nan January 28, Inrinni khan an khuaah an pungkhawm a, lungawi lohna an lantir.

Mamit district-a Silsury khua hi Bangladesh ramri depa awm a ni a, village council pahnih Silsury East VC leh Silsury West VC a awm. BSF 38th battalion-in border out post (BOP) an neihna hmun a ni a, BOP hotu (commander) chu Sat Pal Singh a ni.

Silsury West VC president Paripurno Chakma chuan, an khua chu Bangladesh ramri depa awm a nih angin, Silsury khawlaiah BSF-in BOP an dah tih a tarlang a; khaw chhunga inkalpawh tura veivahnaah BOP paltlang a ngai ṭhin a, BOP paltlang tur lirtheite chu BSF-te'n an endik ṭhin a, an endiknaah mipuite an hnuaichhiah a, an tinawmnah hle ṭhin niin a tarlang.

Paripurno Chakma chuan, Silsury-a Chakma mipui tam zawk chu mi rethei tê tê an nih thu sawiin, "Tualchhunga sumdawng leh dawr neite'n hmun dang aṭanga ni tin mamawh leh dawr bungrua an lâk luhin BSF-te'n BOP-ah an endik a, an hrênsak ṭhin a, harsatna an siam nasa hle. Mimalin an rama mi thing leh mau, an chhungkaw hman tura an lakte leh thing tuah tur an lakte pawh an mansak ṭhin a ni," a ti.

Silsury West VC President tarlan danin, January 26, 2023-ah pawh khan mi pakhatin a in thawm ṭhatna tura a huan/rama thing 30 a lâk chu BSF-te'n an man a; January 26 vêk khan an khaw mi pakhatin truck hmanga buhfai ip 100 a phurh luh chu an man bawk.