Ran vulha hmasawn dan tur sawiho

Animal Husbadry & Veterinary minister Lalrinawma chuan January 28, Inrinni khan a bial chhunga Thinglian khuaah khawtlang hruaitute nen ran vulha Thinglian khuain hma a sawn theih dan tur an sawiho a; Lungpho khaw khelmual zauh dan tur a enfiah bawk.

Lalrinawma chuan, Mizoram leh a bial mipui tana hna thawk theia a awm chhunga a ngaih pawimawh ber pakhat chu eizawnnaa hmasawn a nih thu a sawi a, "Kan thawh rah ṭheuh seng tur kan nih avangin kan hnathawh hian kan ni tin khawsak a hril a, mahni zâwnah mawhphurhna lian tak kan nei. Ran vulhna lama hmasawn theih nan thawhrimna a pawimawh ber," a ti a; a theih ang angin department-in a ṭanpui zel dawn thu a sawi. Thinglianah hian chhungkua 84 an awm mek a ni.

Minister Lalrinawma hian ran in sakna tura khawtlang duhna hmunte a tlawh a, Lungpho khawtlang hruaitute nen Lungpho khelmual laih zauh dan tur an enho bawk.