Champhaiah lirthei khû endikna Champhai DC-in a hawng

Champhaiah lirthei khû endikna Pollution Testing Centre siam a ni a, Champhai district bawrhsap James Lalrinchhana'n January 28, Inrinni khan a hawng.

Lirthei khû endikna hi New Champhaia Ramhrangkawn RD Pump-ah siam a ni a, lirthei khû endikna khawl Smoke Emission Analyser pahnih - petrol engine leh diesel engine pakhat ve ve dah a ni. Two wheeler tan Rs 60, three wheeler petrol engine tan Rs 80 leh diesel engine tan Rs 100, LMV petrol engine tan Rs 120 leh diesel engine tan Rs 150 leh, MMV & HMV tan Rs 200 chawi a ngai.

Champhai DC chuan, lirthei khû endikna leh pollution under control certificate (PUCC) pek chhuah theihna Champhaiah siam a ni ve ta chu district tan méllung pawimawh a nih thu a sawi a; lirthei khalhtute chu an mawhphurhnate hria a, himna tura pawimawhte zâwm tur leh fimkhur leh hawihhâwm taka lirthei khalh ṭhin turin a chah.

Champhai SP Lalrinpuia Varte pawhin thu sawiin, pollution certificate nei lote dap chhuah leh hrem chungchangah dan tlawhchhana hmalak tum a nih thu a sawi a; PUCC nei lote chu MV Act Section 190(2) hmangin thla thum tàntir emaw, Rs 10,000 thleng chawitir emaw theih a nih thu a sawi bawk.