G20 coordinator-te zanriah kîlpui

G20 Meeting chief coordinator Harsh Vardhan Shringla, IFS leh a hote chu January 27, 2023 zan khan Tourist Lodge, Chaltlangah cultural evening hmanpui an nih bakah, Tourism minister Robert Romawia Royte-in zanriah a buatsaihsak a, Mizo hnam ziarâng hrang hrang entir a ni.

Harsh Vardhan Shringla chuan, G20 meeting neihna tura Mizoram sorkar inbuatsaihna fakawm a tih thu sawiin, "Kum lo kal zel turah mite sawi hlawh a nih zui ka ring. Mizoram hi hmun mawi leh nuam tak a ni a, G20 meeting hi ram dang leh khawvel mithmuhah Mizoram pho chhuahna remchang leh hmasawnna rahbi pawimawh tak a ni dawn," a ti.

Robert Romawia Royte chuan, G20 meeting neihna atana Aizawl khawpui thlan ve a ni chu lawmawm a tih thu sawiin, "Sumdawnna leh economy-ah chang ni loin, tourism sector tihchangtlun leh tihhmasawnna tura hun remchang leh pawimawh tak a ni dawn," a ti a; G20 meeting atan theihtawpa an inbuatsaih mek thu a sawi.

Zanriah kîlhonaah hian chief secretary Dr Renu Sharma pawh a tel a ni.