MNF Legislature Party-in UCC an duh lo; Deputy speaker atan H Biakzaua an thlang

Chief minister Zoramthanga hoa nimina Assembly House recess room-a MNF Legislature Party (MLP) ṭhukhawm chuan Uniform Civil Code (UCC) ṭha lo an tih thu an tarlang a; an party aṭanga Assembly deputy speaker candidate atan Lawngtlai East bialtu MLA H Biakzaua an thlang.

MLP chuan UCC hmang tura hmalakna awm mek chu ṭha an ti lo a, "Tun Assembly budget session lo awm turah hian lungrual taka UCC duh lohna pass dan kawng dap ni se," an ti.

Inkalpawhna kawngpui ṭha zawk Mizoram mipuiin an neih theih nan MNF sorkar tirh aṭangin theihtawp chhuah a nih thu MLP meeting-ah an tarlang a, nasa zawka ṭan lak chhunzawm an rél a ni.

Ṭhutkhawma tarlan danin, SEDP thawh khatnaah chhungkaw 60,000 hnenah first instalment pek niin, a dawng tur chhung tin hnenah Rs 25,000 zela pek chhuah a ni tawh a; second instalment pek leh tur pawh sanction a ni tawh a, a tahtawla sem thuai a ni dawn.

Chhungkaw 60,000 hnena SEDP ṭanpuina pek mek bakah, sorkar kum thar 2023-24 ah chhungkaw dang tam tak, second phase leh third phase thlenga thlan belh a, pek zui zel turin MLP chuan hmalak an rél a ni.

Assembly deputy speaker aṭanga December 15, 2022-a Lalrinawma a bàn hnuah Mizoram Assembly-in deputy speaker a la nei lo a, February 8, 2023 khian Assembly session-ah deputy speaker tur thlan a ni ang. MLP chuan an candidate atan H Biakzaua an thlang a ni.

MLP hian MNF sorkar kal mek hmalakna hrang hrang an thlir a, February 7, 2023-a ṭan tur Mizoram Assembly budget session chungchang an thlirlâwk bawk.

Deputy speaker atana MLP-in an thlan H Biakzaua hian nimin tlai khan Assembly secretary Lalhmahruaia Zote hnenah nomination paper a thehlut nghal. H Biakzaua hi East Tuipui bialtu MLA Ramthanmawia'n a rawt (nominate) a, Lengteng bialtu MLA Dr L Thangmawia'n a thláwp (second) a ni.

H Biakzaua'n nomination paper a thehluhnaah hian Parliamentary Affairs minister TJ Lalnuntluanga leh Dr Vanlalṭan­puia, MLA-te'n an ṭawiawm bawk.