MP-in ráltlân chungchang a thlen

Sorkar laipuia Defence minister Rajnath Singh hoin nimin khan New Delhi-a Parliament Library Committee Room-ah party hrang hrang aṭanga MP-te'n vawiina Parliament budget session neih tur an sawiho a, Rajya Sabha MP K Vanlalvena pawh telin, ráltlân chungchang a sawi chhuak.

K Vanlalvena chuan, Mizoramah Myanmar aṭanga ráltlân eng emaw zat enkawl mek an nih laiin, Bangladesh aṭanga ráltlân lut turte erawh chu BSF-in ramri-ah an lo dan ṭhin thu a sawi a, "Mizo hnahthlak ralthuam kengte leh Bangladesh Army-te chu niminah pawh khaw pakhatah niléngin an inkâp a, civil mite chu an sahim nan Mizorama an lo luh phalsak ngei a ṭul," a ti a; sorkar laipuiin Bangladesh aṭanga ráltlânte Mizorama luh phalna BSF hnenah a pek thuai a ṭul thu a sawi tih sorkar thuchhuahin a tarlang.