UCC leh kuhva chungchangah MKHC-in CM an hmu

Mizoram Kohhran Hruaitute Committee (MKHC) hruaitute chuan nimin khan chief minister Zoramthanga hmuin, Uniform Civil Code (UCC) dodal kawngah na zawka hma la tur leh ram dang aṭanga dan loa kuhva lak luh khuahkhirh a nih theih nan chak zawka hma la turin an ngen.

UCC leh kuhva rah tawlh rûk chungchang Chief Minister hnena thlen hi MKHC hruaitute ṭhukhawm chuan an lo rel tawh a, chumi ang chuan nimin khan CM hmuin an thlen ta a ni.

MKHC secretary Rev. R Lalrinsanga chuan, UCC chu sakhaw tênau leh hnam tlem zawkte rahbeh theihnaa an ngaih thu sawiin, "Mizoram sorkarin Assembly-ah UCC duh lohna thu an pass kan beisei thu kan hrilh a, UCC hi Rajya Sabha-ah pawm tawh mah se, Lok Sabha-ah an la sawiho dawn a, kan MP-te pawhin na zawka an dodal theih nan hma la turin kan ngen a ni," a ti.

Mizoram Kohhran Hruaitute Committee Secretary sawi danin, CM Zoramthanga chuan UCC an duh loh thu leh political party dangte pawhin an duh a rin loh thu a lo hrilh a; Assembly-ah pawh UCC duh lohna thu an pass theih mai a rin thu a sawi a ni.

Rev. R Lalrinsanga chuan, ram dang aṭanga dan loa kuhva lak luh leh tawlh rûk tih tawp a nih theih nan chak zawka hma la turin CM an ngen tih sawiin, "A ṭul a nih chuan dan hnuaia lak luh a nih theih nan hma la mai turin kan ngen. Chuti a nih loh chuan Mizo leh Mizo inhmélmâkna a thlente pawh a hlauhawm," a ti a; Mizorama thar kuhva hralh a nih theih nan hma la turin an ngen nghal tih a sawi.

Kuhva chungchangah hian CM chuan, sorkarin theihtawp chhuahin hma a la reng a, khuahkhirh an tum reng thu te, sorkar laipuiah pawh an thlen ṭhin thute a lo hrilh tih MKHC Secretary chuan a sawi bawk.