Hmun kil zawkah service ṭha pe turin Governor-in BSNL leh BBNL a chah

Governor Hari Babu Kambhampati chuan nimin khan Raj Bhavan-ah Bharat Sanchar Nigam Ltd (BSNL) leh Bharat Broadband Network Ltd (BBNL) hotute a kâwm a; hlâwkna ûm lutuk lo a, service ṭha zawk leh technology tunlai zawkte Mizoram hmun kil zawka chêngte tan pe turin a chah.

Dr Hari Babu Kam­bhampati chuan, BSNL leh BBNL hotute chu sorkar telecom provider an nih angin hlawkna ûm aia service ṭha pek tum zawk tur an nih thu a sawi a, "Siaha leh Lawngtlai district bikah internet leh phone network connectivity a chhe zual a, bank tan pawh hna thawh ngaihna a awm lo. Bank mamawhtu mipuiin an tuar rei tawh a, heng hmunahte ṭan la zual ang che u," a ti.

Fibre hmanga inter­net chak chi pek leh 4G tower kaltlanga 4G internet service pekah hmalak ran a ngaih thu sawiin Larsap chuan, "Kawngpui awm lohna hmun tlem azawngah tower sakna bungrua lak luh harsatna hmun a awm a, heng hmunahte hian helicopter hmanga bungraw thliar luh dan dap turin ka duh che u a ni," a ti bawk.

Inkawmhonaah hian BSNL general manager Arun Kumar leh assistant general manager C Lalawmpuia te, BBNL deputy general manager Rameshwar Prasad bakah hotu dangte an tel a ni.