Dan loa tawlh kuhva dahna kudamte kalh turin sorkarin hma a la dawn

Myanmar lam aṭanga dan loa kuhva rah lak luh, Mizoram district hrang hranga awm zatte kumin February thla chhungin khawn khawm a, dan loa kuhva dahna kudamte kalh a nih theih nan sorkarin hma a la dawn.

Mizoram sorkarin dan loa kuhva tawlh rûk chungchang ngaihtuah tura a din Task Group on Illegal Arecanut chu nimin khan an chairman H Lalengmawia, Home secretary kaihhruaiin an ṭhukhawm a; dan loa lak luh kuhva district hrang hranga chhêk khâwl awm zat February 2023 chhungin khawn khawm a, kuhva dahna kudamte kalh a, dan anga hmalak a nih theih nan Customs department-ah report thehluh an rêl a ni.

Ṭhutkhawmah hian Mizorama check gate-te tun aia chak lehzual leh awmze nei zawka hman a nih theih nan police-in hma la se, an ti a; a theihna leh ṭul apiangah Central YMA-in YMA branch hrang hrangte kaltlangin police-te an ṭanpui ang, an ti.

Task Group-in hma an lak zui zelna turin hmun hrang hranga dan loa kuhva chhêk khâwlna kudamte awmna LSC/VC pass-te kimchang takin DC-te'n Home department-ah report thehlut se, an ti bawk.

Task Group chuan, dan loa kuhvaa sumdawnnaah inhnamhnawih lo tur leh inhnamhnawihte pawh rang taka tàwpsan turin a hriattir nghal a ni.

Nimina ṭhutkhawmah hian Home department, Mizo­ram Police, Law & Judi­cial department, Central YMA, Assam Rifles, Border Security Force leh Direc­torate of Revenue Intelli­gence aiawhte an tel.