Bilkhawthlir leh Selingah kuhva rah man

Kuhva Chingtu Cooperative Society, Bilkhawthlir (KCCSB) duty-te chuan January 29, Pathianni zan khan Vairengte aṭanga Bilkhawthlir lam pana tlan truck pathum aṭangin ram dang aṭanga dan loa kuhva rah lak luh nia hriat an man leh a; Mizoram police-in Selingah kuhva rah ip 86 an man bawk.

KCCSB secretary Vanlalhmuaka hnen aṭanga thu dawn danin, kuhva rah phurtu truck-te chu state dang registration a ni hlawm a, a khalhtu leh a chuangte pawh hnam dang an ni hlawm a, truck pakhat khalhtu erawh chu Mizo, Vairengte AOC Veng mi a ni thung.

Truck pahnih chu zan dar 7 velah an man a, a hnu zan dar 10 velah truck dang pakhat an man leh bawk a; kuhva phurhna atana siam danglam an ni.

Vanlalhmuaka chuan, kuhva phurtu truck-te chu en mai chuan a ruak angin a lang tih a sawi a, "A ruak anga a lan avangin kan tlangtir mai a, mahse, a tlân danah phurh neia a lan avangin kan ûm zui leh a, kan endik a, kuhva rah kan hmu chhuak ta a ni," a ti.

KCCSB duty-te chuan kuhva rah an mante chu an la khawih che lo a, lirthei aṭanga an la hlân thlâk loh avangin a zat an la hre thei lo a ni.

Bilkhawthlira kuhva chíngtute hi dan loa kuhva tawlh rûk tihtawp a nih theih nan December 14, 2022 aṭangin chhun zan zawmin Bilkhawthlir dáiah an duty ṭan a, kuhva phur nia an rinhlelh lirtheite an enfiah ṭhin. Nikum December 14 aṭanga nimin thleng khan kuhva rah ip 600 chuang an man tawh.

Vairengtea kuhva chíngtute pawhin Vairengtea kudam hrang hranga kuhva rah ro dahte chu January 2023 chhung ngeia senghawi turin kudam neitute an hriattir a; hei vang hian tun hnai tê-ah Vairengte aṭanga kuhva rah phurh chhuah a tam nia a lan thu, KCCSB hruaitute chuan an sawi.

Selinga police out post-a duty-te pawhin January 29, Pathianni khan lirthei pathum an endiknaah ram dang aṭanga lâk luh nia hriat kuhva rah ip 83 (kg. 6,640 vel) an man bawk.

Police-te hian kuhva rahte chu Aizawl lam pana tlan pick-up pathum - MZ-04 A-3768, MZ-04 A-5875 leh MZ-04 A-0467 aṭangin an man a; lirthei khalhtute chu Lalramchhana (50) s/o Challiana, Rualthankhuma (30) s/o Thanglawta leh C Lalduhsaka (22) s/o C Lalhmunthanga Champhai Zotlang nia inchhálte vek an ni.