KHAWTHLIR

Martyr’s Day
Nimin January 30 kha India-in zalenna a sualnaa ram tana nunna hlântute hriatrengna ní Martyr’s Day a ni a, he ni pual hian Mizoramah pawh hun hman a ni. Martarte Ni hian ram pumah chawhma dar 11-ah martarte hriatreng nan leh zahna lantir nan Mizoram sorkara department leh pisa hrang hrangah hun hman a ni a, minute hnih chhung ngawi rengin hun hman a ni.

Kângmei tum 300
Kolasib District Fire Prevention Committee chuan nimin khan an chairman John LT Sanga, bawrhsap hoin an ṭhukhawm a, February 6-10 inkara Fire Prevention Week hman dan tur an sawiho. Meeting-a tarlan danin, kum 2022 chhung khan Kolasib district-ah ram hectare 464.99-a zauah kângmei ṭum 300 a chhuak a, chu'ng zinga 288 chu lo/leipui/huan hâlna niin, 12 chu ram kâng a ni.

COTPA bawhzui
Champhai District Nasha Mukt Bharat Abhiyaan committee bultumin nimin khan vantlang hmuna meizûk phal lohna dan, Cigarettes and Other Tobacco Products Act (COTPA), 2003 zawm a nih leh nih loh endik a ni a; sikul leh a chhehvel an tlawh bakah, a remchan angin vaihlo ṭhat lohzia an zirtir a ni.

Bawlhhlawh sawiho
Lawngtlai bawrhsap Amol Srivastava hoin nimin khan DC conference hall-ah Lawngtlaia bawlhhlawh ṭawih thei lo sâwngbâwl leh thliar hran chungchanga hmalak dan tur sawiho a ni. Khawpui chhung in tin aṭanga bawlhhlawh khawnah, bawlhhlawh ṭawih thei leh ṭawih thei lo khawn dan felfai zawk ruahman a nih theih nan LADC Sanitation department-ah thlen ni se, an ti.

Kângmeia himna chungchang zirho
Lunglei District Disaster Management Authority (DDMA) chuan nimin khan Lunglei Convention Centre hall-ah Fire Safety Awareness Seminar an buatsaih a, DDMA chairman Kulothungan A, bawrhsapin a hmanpui. Kângmei laka fimkhurna turte inzirtir a ni.