Sipai officer-te'n Thenzawl an tlawh

National Defence College-a National Security & Strategic Course zir mek India sipai officer-te leh India ram ṭhian ṭha ram dang paruka sipai officer-te chuan nimin khan Thenzawl an tlawh a, Thenzawl Golf Course conference hall-ah sorkar hotute leh khawtlang hruaitute nen an inkâwm.

Maj. Gen. Hari B Pillai chuan, National Defence College chu kum 1960-ah din a nih thu te, National Security and Strategy Course zir turin Army, Navy leh Air Force aṭangte leh India ṭhian ṭha ram dang sipai colonel chin chung lamte thlan ṭhin an nih thu a sawi.

Hari B Pillai chuan, "Kan zirlaite hi a chángin India ram chhung fanpui an ni a, a chángin ram dangahte pawh kan zinpui ṭhin. Tuna zir mekte hi team pasarihah ṭhendarhin, India ram hmun hrang hrang fanpui mek an ni a, India rama hnam hrang hrangte nunphung leh hnam ziate zir a, mipui nunphung hre tura zin kan ni," a ti a; Thenzawla an lo dawnsawn danah an lawm thu leh Mizoram nuam an tih thu a sawi bawk.

National Security & Strategic zir mek ram dang sipai officer-te chu France, Japan, Bangladesh, Bhutan, Uzbekistan leh Oman sipai officer-te an ni a; Mizoram rawn tlawhtute chu mi 18 an ni.

Serchhip additional DC Lalmuansanga Ralte-in Serchhip district dinhmun tlangpui a sawi a, Serchhip SP Stephen Lalrinawma'n venhimna lama Serchhip district dinhmun a sawi. Police Training School, Thenzawl principal HL Thangzuala, Horticulture College principal Dr Shri Dhar, Forest officer Lalbiakchama Chawngthu leh AH&Vety officer Dr Lalmuanpuia Samte ten an hmalakna tlangpui an sawi bawk.