Bharat Jodo Yatra pualin hun hmang

Congress party chuan nimin khan Aizawla Congress Bhavan kawtah Bharat Jodo Yatra pualin hun an hmang a, Mizoram Pradesh Congress Committee (MPCC) president Lalsawta'n thu a sawi.

Bharat Jodo Yatra hi Congress party hruaitu Rahul Gandhi hoa September 7, 2022 aṭanga Kanyakumari, Tamil Nadu aṭanga India ram chhunga thil man sang chak lutuk (inflation), hnathawh tur nei lo pung nasa lutuk (unemployment) leh sakhaw intluktlânna (secularism) chungchanga kawng zawhna a ni a; January 29 kha a kharna hun ni mah se, Pathianni a nih avangin MPCC chuan nimin khan hun an hmang a ni.

MPCC president Lalsawta chuan, Bharat Jodo Yatra chu Mizoram tan pawh a pawimawh hle tih sawiin, "Uniform Civil Code leh Citizenship (Amendment) Act, 2019-te hian Mizote hi sírah min hnâwl hret hret a, min luahlântu an awm chho mek zel. Political party, kohhran leh NGO hrang hrangte ṭan rual a ngai tak zet a ni. Mizoram hi India ramah kan la awm miau avangin Mizoram mipui leh Mizo hnam tel lohna India a kim thei lo," a ti.

Bharat Jodo Yatra khârna pui ber chu Pathianni khan Lal Chowk, Clock Tower (Ghanta Ghar), Srinagar-ah hman a ni a; September 7, 2022-a Kanyakumari-a ṭan a nih hnuah Rahul Gandhi leh a thurualpuite chu Jammu & Kashmir thleng kein an kal a, ni 137 chhungin state 12 leh union territory pahniha district 47 paltlangin, km. 4,080 an kal a ni.