Kângmei vên puangzar tam turin VC, YLA leh kohhrante ngen

Lawngtlai District Committee on Fire Prevention chuan nimin khan an chairman Amol Srivastava, bawrhsap hoin kângmei vên dan tur an sawiho. Ram kâng tur vênna atana meilam sial leh kângmei vên chungchanga mipui zirtirna a tam thei ang bera puangzar turin VC, YLA leh kohhran an ngen.

Ṭhutkhawmah hian kumin ṭhál chhungin Lawngtlai district-ah kângmei vênna lam inzirtirna uar zawka buatsaih te, khaw hrang hrangah mipui zirtira kal chhuah te, media kaltlanga sawihona tihchhuah te, video tawi siam leh thuziak (hoarding board/poster) tàrte an rêl.

Kângmei vên lama thawk ṭha khuate chawimawina hlan te, lo hâl hun hnuhnung atana Mizoram sorkarin March 15, 2023 a ruahman chu zawm ve te, leipui/huan hâl hun leh protected area chhehvel khuaa lo hâl hun hnuhnung atana March 3, 2023 bithliah turin LADC thuneitute ngen te, sa pêla ramvah leh ram hâl khapna tichhuak tura District Magistrate ngente an rêl bawk.

Bawrhsap Amol Srivastava chuan, kângmei chhuak vanga ramngaw chereu leh boruak bawlhhlawh chu ramsa leh mihring tan a pawi thu a sawi a, "Ramsa leh mihring tan thihna hial a thlen thei a, kângmei a chhuah lohna tura invên lâwk hi khua leh tuite mawh a nihzia inzirtir uar zel a ṭul," a ti.