Sarâng tihrêm dan tur sawiho

Kolasib district bawrhsap John LT Sanga kaihhruaiin nimin khan DC conference hall-ah sorkar hotu te, kohhran leh tlawmngai pawl aiawhte an ṭhukhawm a; Kolasib khawpuia chak zawka bawlhhlawh thliar hranna kalpui leh hman khat daih sarâng tihrêm dan tur an sawiho.

Ṭhutkhawmah hian khawtlang inkaihhruai danah naupangte'n faina an seilenpui theih nan uar zawka bawlhhlawh thliar hran pawimawhna leh fai tura inzirtirna kalpui a ṭul thu sawi a ni a; UDPA leh School Education department-te'n Kolasib-a zirtirtute leh zirlaite tan Workshop on Sewage & Solid Waste Management buatsaih se, an ti.

Dihmuntlanga Solid Waste Management Centre chu awmze nei zawka hman a nih theih nan in tinah bawlhhlawh thliar ngai pawimawh tura inzirtir a ṭul thu te, a hun leh hmuna bawlhhlawh paih lo leh thliar hrang ṭha lote hremna a ngaih thu te, sorkar hmalakna piah lamah khawtlang leh kohhran hruaitute an pawimawh thute an sawi.

Hmunhma neite tan an in bul hnaiah bawlhhlawh ṭawih thei an sâwngbâwl theih nan Rural Development department leh Thingdawl leh Bilkhawthlir BDO-te hmalakna hnuaiah compost pit siam an rêl bawk.