Governor leh MTP hruaitute inkâwm

Governor Dr Hari Babu Kambhampati chuan nimin khan Raj Bhavan-ah Mara Thyutlia Py (MTP) hruaitute a kâwm a; MTP hruaitute thu sawite chu uluk taka zir chian a, a ṭul anga bawhzui a nih tur thu a hrilh.

MTP hruaitute chuan, Mara hming leh khaw hmingte chanchin tharah dik taka lam rîk a nih theih nan Doordarshan Kendra-ah Mara ṭawng thiam an thawh ve ngaia an hriat thu an thlen a; kumin Independence Day lawmna pui ber Delhi-ah MTP cultural troop-in Sawlakia an entir theih nan hmalaksak turin an ngen.

Ráltlân chungchanga Assam Rifles duty-te lakah harsatna an tawh ṭhin thu sawiin MTP hruaitute chuan, harsatna tihtawp a nih theih nan hma la tur te, Siaha district-a NIHDCL leh BIPL-te'n national highway kawngpui an siam chu duhthusam lohna tam tak a awm thu te, fûrpui thlen hma ngeia mipui náwlpui tana harsatna a thlen loh nan kawngpui siam zawh a nih theih nan hma la tur te, internet service an neih ṭhat loh thute an thlen bawk.