MNF sorkarah zu leh drug a hluar - PC Party

Peoples' Conference party chuan thuchhuah siamin, chief minister Zoram-thanga kaihhruai sorkar hnuaiah zu leh ruihhlo a hluar niin an tarlang.

Mizoram hmun hrang hranga zu leh damdawi ruih-hlo a hluar ta hle chu pawi an tih thu tarlangin PC party chuan, "Ni tin deuhthaw, a bikin damdawi tawlh rûk man thàwm hriat tur a awm deuh reng mai te, dan loa zu zawrhna hmunpui suasam leh tam tak man a ni reng maite hian dan leh thupek kenkawhnaa Mizoram sorkar hlawhchhamzia a tilang chiang hleah kan ngai," an ti.

PC party chuan, "Mizoram ramri hrûl leh a chhehvel aṭanga samkhai taka dan phal loh thil tawlh ru ṭhinte dang chêp thei lo khawpa Mizoram sorkar a tâlbuai reng mai hi a mualphothlak tak zet," an ti a; ruihhlo leh dan loa sumdawnna danchah a nih theih nan chak zawka hma la tur leh theihtawp chhuah turin Mizoram sorkar an ngen a ni.