Tuirial lui túra hrai vangin FIR thehlut

Tuirial lui túr hmanga hrâi a nih avangin Save Mizoram Rivers leh Mizoram Zoological Society hruaitute chuan nimin khan Kulikawn Police Station-ah first information report (FIR) an thehlut.

Save Mizoram Rivers chuan, Tuirial lui hnár lam, Phulpui leh Baktawng inkara túr phul a nih chungchanga hriat nei chuan Kulikawn PS (0389-2322379)-ah emaw, Aibawk Forest Range Officer (8974103902)-ah emaw, SMR Working Chairman (9615949012)-ah emaw hriattir turin mipui an ngen.

Luia nungchate túra hraitute chu The Mizoram Forest Act, 1955 leh The Mizoram Fisheries Act, 2002 hmangin thla ruk chhung tàntir leh pawisa chawitir theih a ni a; ramngaw leh nungcha tichhe zawnga pawikhawihna a thlenin, thuneitute hnena thlentu leh thil sual titute man kawnga thuneitu ṭanpuitute chu The Mizoram Rewards for Detection of Forest and Wildlife Offence Scheme, 2019 hnuaiah lawmman pek theih a ni.

The Mizoram Rewards for Detection of Forest and Wildlife Offence Scheme, 2019 hnuaiah lawmman pek theih a nih angin, Tuirial lui túra hrai a nih thu thuneitute hnena thlentu hnenah EFCC department chuan Rs 3,000 an pe nghal a ni.