NEC Golden Jubilee lawm a ni; Hmarchhak state dangte entawn ni tura theihtawpa bei turin CM-in mipui a sáwm

Nimin khan Lammualah North Eastern Council (NEC) lawm a ni a; khuallian, chief minister Zoramthanga chuan, kawng tinrénga hmarchhak state dangte entawn ni tura theihtawpa bei turin mipui a sáwm.

CM Zoramthanga chuan, Mizoram chu hmarchhak state zingah state lian leh mihring tamna ni lo mah se, state dangte entawn tlakin an siam thei tih a sawi a, "Mizoram hi lehkhathiam rual awm khawmna, khawtlang inpumkhat leh ṭanrualna ram a ni. State dangte tan rinawmna leh inhmangaihna kawngah te, tlawmngaihnaahte entawn turin awm zel ila. Tunah pawh remna entir nan ram rálmuang ber kan ni a, kawng chi tinréngah entawn turin theihtawpin i bei zel ang u," a ti.

Hmarchhak state-ahte hmasawnna a hniam avangin NEC din a nih thu sawiin Zoramthanga chuan, "A hnuah Ministry of DoNER a piang. A hranin hmarchhak state-te tan budget dah a ni a, hmasawnna kan neih theih phah a ni," a ti a; NEC vanga Mizoram leh hmarchhak state-te'n kawng hrang hranga hmasawnna an neih phah chu ropui a tih thu a sawi.

Khualzahawm H Rammawi, State Planning Board vice chairman pawhin thu sawiin, sorkar laipuiin hmarchhak state-te hmasawnna turin kum tin sum leh pai a bikin a dah hran thu a sawi a, "Hamṭhatna kan dawn theih nan NEC leh DoNER min siamsak. Mizoram leh India hmarchhak state-te tan NEC hi a hlu hle a, golden jubilee ropui taka lawm hi a phu tak zet a ni," a ti.

NEC kum 50 tlin lawm nan hian nimin zing khan Aizawlah NEC Golden Jubilee Run buatsaih a ni a, mi ṭhahnem tak an tel. Sikulpuikawn aṭangin Lalrintluangi, Mount Everester-in vailiamin, Chanmari aṭangin footballer S Malsawmtluanga'n a vailiam a; Lammualah an intawk khawm a ni. Chhunah Lammualah inhruipawh (tug of war)-a intihsiak buatsaih a ni bawk a; mipa team 55 leh hmeichhia team 16 telin, Durtlang North ve ve an champion a ni.

NEC golden jubilee pualin Planning & Programme Implementation department chuan nimin tlai khan Aijal Club-ah Symposium cum Dinner an huaihawt a; Governor Dr Harti Babu Kambhambati-a'n a hmanpui. Chief secretary Dr Renu Sharma, NEC planning adviser CH Kharshing leh Planning secretary Lalmalsawma Pachuau te pawhin an hmanpui.

Symposium cum Dinner-ah hian thupui chu 'Mizoram - A developed State by 2027 - Challenges, Way Forward and Role of NEC & DoNER' tih a ni a; mithiame'n thupui péng hrang hrangte an sawi bakah, sawihona hun hman a ni.

NEC golden jubilee hi NEC hmunpui Shillong-ah December 18, 2022 khan prime minister Narendra Modi hoa lawm a ni tawh a, hmarchhak state hrang hrangah lawm chhoh mek zel a ni.