Lawngtlai MJA-in inkhawmpui an hmang

Mizoram Journalists' Association (MJA), Lawngtlai district chuan nimin khan Lawngtlai Press Club-ah Annual Conference an hmang a; Lawngtlai bawrhsap Amol Srivastava-a'n khuallian niin a hmanpui a, MJA Gen.Hqrs hruaitute'n an hmanpui bawk.

Lawngtlai MJA conference-ah hian chawhma lamah president Lalngheta Ralte kaihhruaiin rorel a ni a, chawhnuah vice president Elvis Lalthangzuala kaihhruaiin inkhawm a ni. Rorelah hian resolution an siam a, "Sorkar laipui hmalaknaa Mizoram chhim lam kawngpui siamṭhat mek a ni hi lawmawm kan ti a, kawngpui ro tling kan neih theih nan hna thawktute'n rin tlakin thawk se kan ti," an ti.

Chawhnu lama inkhawmah khuallian Amol Srivastava chuan, Lawngtlaia MJA-te nen inpawhna ṭha tak an nei a, kawng hrang hrangah MJA thlâwpna a dawn ṭhat thu a sawi a, "Journalist-te hi sorkar leh mipui inkar thlun zawmtu, sorkar hmalakna mipui a thlen theihna tura hmanraw pawimawh an ni," a ti a; sorkar inrêlbàwlna felfai a awm theih nan sorkar thawhpui zel turin a sáwm. DC hian conference lawmpuina pawisa a hlàn a ni.

Khualzahawm, MJA Gen.Hqrs treasurer C Lalhmachhuana pawhin thu sawiin, Lawngtlai district MJA-te chu kawng tam takah MJA Gen.Hqrs leh district danga mite tan entawn tlak an nih thu a sawi a; social media chak tak karah inthlahdah loa intuai hriam zel tur leh hmasawn zel tum turin a chah.

Inkhawmah hian IPRO C Lalhruaitluanga pawhin thu a sawi a; Lawngtlai aṭanga chhuak tur bawrhsap Amol Srivastava, MJA Lawngtlai adviser ni bawk thlah nan ngaihhruina an hlan a ni.