Thutiamah kan rinawm lo a nih chuan min chhuahsan leh turin kan inngen - Lalduhoma

ZPM leader Lalduhoma chuan, kalphung thar, mipui sorkar an tihin a ken tel chu danglamna a ni tih a sawi a; party-ah rinawm lo a, policy-a rinawm turin an inzirtir ṭhin tih sawiin, ZPM chu an thutiamah an rinawm lo a nih chuan an party chhuahsan leh mai turin mipui a chah.

ZPM Tuirial East & West Joint Block Conference nimina Awithangpa Hall, Kawnpuia neihah thu sawiin ZPM Leader chuan, "Party-a rinawm kan inzirtir lo a, policy-a rinawm turin kan inzirtir ṭhin. Pathian leh mipui hmaa kan thutiamah kan rinawm lo a nih chuan min chhuahsan leh ngam turin kan inngen. Tu pawh sorkar se, thlan leh tlâk an nih chuan thlang leh mai ila, thlan leh tlâk an nih loh chuan kan thlâk mai tur a ni," a ti.

Lalduhoma chuan, kalphung thar mipui sorkar tihin a ken tel chu danglamna a nih thu sawiin, "Sorkar kan hrawn tawhte lakah kan danglam tur a ni a, kan unit, group leh block-te thlengin kan danglam tur a ni. Pathian zara kan sorkar a nih pawhin, kan danglam loh chuan awmzia a awm dawn lo," a ti a; sorkar ding tawhte chu party sorkar a nih avangin thil ṭha turah pawh an party-in a ṭhatpui dawn loh chuan an tih duh loh thu a sawi.

Kalphung thar hmang turin mi thar an ngai tih sawiin Lalduhoma chuan, "Budget pharh ṭhang leh a pawhpên dan thiam tawhten he kalphung hi an khawih thei lo. Kalphung thar khawih turin party thar, mi thar kan mamawh. Kalphung thar awmzia chu mipui sorkar a ni," a ti.

ZPM Leader chuan mipuia sum sem chungchang sawiin, "Sem policy hian kan ram a tichhe em em a, kan rilru sûkthlêk thlengin ngawng ṭha lo tak a nei a, a nei zel dawn ni pawhin a lang. Kan ram politics-ah lungphùm thar phúm turin kan insâwm a ni," a ti a; sorkar tawhteah ṭha taka hna thawh awm bawk mah se, a tam zawkin hna an thawh ṭhat loh avangin ramin a tuar a, Mizoram tichhetute chu ruling party an nih zel thu a sawi.

Lalduhoma chuan, ZPM chu ram tichhetu an ni ve thiang lo tih sawiin, "Politics hi khelh fuh ni loin, khêl dik turin kan inzirtir ṭhin a, mi ṭhate tel ve theihna turin politics hi kan siam tur a ni," a ti a; Mizoramah neutral mipui an tam avangin Mizoram politics-ah a ṭha zawngin nghawng a neih ngei an beisei thu a sawi bawk.

ZPM PAC member TBC Lalvenchhunga pawhin thu sawiin, ZPM chu party rethei ber ni mah se, an thawkrim ber niin a sawi a, "He ram hi chhan tlak a la awm a, sorkar fel fai, dan rorelna tung ding ngam siam kan tum tur a ni," a ti.

Inkhawmah hian ZPM zawm thar mi 607 lawm luh an nih thu ZPM thuchhuah chuan a tarlang.