Bible-in mipa-hmeichhia inneih dan A sawi ang chauh SA-in kan pawm - Gen. Brian Peddle

Salvation Army hruaitu lu ber Gen. Brian Peddle chuan, lesbian, gay, bisexual, transgender, queer (LGBTQ) chung-changa zawhna chhangin, Bible-in mipa leh hmeichhia inneih dan a sawi ang chauh Salvation Army chuan an pawm thu a sawi.

Salvation Army, India Eastern Territory (IET) inkhawmpui lian hmanpui tura lo kal Gen. Brian Peddle hian nimin khan SA Territorial Headquarters-a Booth Mansion conference hall-ah thuthar thehdarhtute a kâwm a ni.

Gen. Brian Peddle chuan thuthar theh-darhtute zawhna chhang-in, LGBTQ chungchanga khawvel hmun hrang hranga inhnialnaah Salvation Army an inrawlh ngai loh thu a sawi a, "Salvation Army chuan mi tu mah thliar hran kan nei lo a, intluktlang takin kan en vek. Eng ang mi pawh ni se, puih an ngaihna laiah chuan kan pui thei vek a, chutihrualin, Bible-in mipa leh hmeichhia inneih dan a sawi ang chauh hi kan pawm a ni," a ti.

Ram inrêlbàwlnaah remna leh muanna a awm theih nan khawvel hmun hrang hranga Salvation Army-te'n hma an lâk theih reng thu te, hmun ṭhenkhatah chuan hmalakna a awm mek thu te, Salvation Army-ah hmeichhiate tan khawvel puma hruaitu lu ber, general nih a theih thute a sawi bawk.

Gen. Brian Peddle leh a nupui Com. Rosalie Peddle te nupain SA India Eastern Territory an tlawh hi tun hnaia India rama Salvation Army territory paruk zinga pathum an tlawhna a ni a; zaninah chief minister Zoramthanga'n zanriah a buatsaihsak dawn a ni.

Naktuk zana R Deng-ṭhuama Hall-a ṭan tur Salvation Army Territorial Congress a hmanpui dawn a, a chàm chhungin Salvation Amry biak-in ṭhenkhat a hawng dawn bawk a; February 5-ah Mizoram a chhuahsan ang.