KHAWTHLIR

MLA-in tanpui
Aizawl South-II bialtu MLA Lalchhuanthanga chuan nimin khan a biala hmun pawimawhte a tlawh a, Govt. Aizawl College hostel tan refrigerator pahnih, dining table pahnih, almirah pahnih leh chair 20 a pe. Urban Primary Health Centre, ITI Veng tlawh bawkin, doctor leh thawktu dangte nen an inkâwm a, "UPHC-ah hian khawl hman tlak a awm meuh lo a, hmanraw tihchangtlun kawngah theihtawp kan chhuah a ngai a ni," a ti.

ZMC-ah city bus
Vawiin, February 1 aṭang hian Aizawl leh State Referral Hospital, Falkawn/Muallungthu inkarah Aizawl city bus a tlân ṭan dawn a, bul ṭannaah hian minister Dr R Lalthangliana'n a vai liam ang. Falkawn lama tlan tur city bus hi Ngaizel leh Bawngkawn aṭanga chhuak tur a awm dawn a ni.

Misual man
Lunglei police-te chuan January 30, Thawhṭanni tlai khan an thu dawn bawhzuiin Dholai Police Station, Assam-a thubuai nei lai mi pahnih - Sajid Ahmed (29) s/o Khiru Uddin leh Abdul Motin (37) s/o Kasim Ali, Karimganj district, Assam ve vete chu Serkawnah an man. Mi pahnih la tur hian Assam police-te Lungleiah an kal a ni.

MYC Youth Centre
Mizoram Youth Commission chairman Dr Vanlalṭanpuia chuan nimin khan Lunglei Theiriatah MYC Youth Centre thar a hawng. Youth Centre hi cheng nuai 400 sénga sak a ni. MYC Chairman chuan, Youth Centre dinna tura ram petu Theiriat VC, YMA leh khawtlang mipui chungah lawm-thu a sawi.

Kawng khar dawn
Chanmari leh Vaivakawn inkar kawng chu naktuk aṭanga February 4, 2023 thleng zing dar 9:30 leh tlai dar 4 inkarah PWD-in an siamṭha dawn a, hna thawh zawh hma chu kawngpui khar a nih dawn thu leh lirthei tlan tlang theih a nih dawn loh thu Traffic SP Roding-liana Chawngthu-in a tarlang.

AMC City Bus Terminal hawng
Zemabawka AMC City Bus Terminal siam thar chu nimin zing khan Aizawl deputy mayor R Thanglura'n a hawng a; bus terminal chu thianghlim leh fai taka enkawl turin Zemabawk khawtlang mipui leh bus enkawltute a chah.
City Bus Terminal siamna atan cheng nuai 97.94 hman a ni a, ṭum khatah bus 25 leng tura ruahman a ni. Ṭhut chawlhna leh zunram inthiarna siam a ni bawk.

ZMC Girls Hostel thar hawn a ni
Social Welfare & Tribal Affairs (SWTA) minister Lalrinawma chuan nimin khan Zoram Medical College (ZMC) Girls Hostel sak thar a hawng a; hmasawnna leh inrêlbàwlna ṭha nei zel turin mahni chanpual leh mawhphurna ṭheuh ṭha taka hlen ṭhin a pawimawh thu a sawi.
ZMC Girl Hostel hi cheng nuai 350 sênga sak a ni a, contractor chu Phoko Builders, Aizawl a ni. A hawnnaah hian bialtu MLA Prof. F Lalnunmawia pawhin thu a sawi.