Zirlaiten MSSSB Chairman Pisa kai tur an dang dawn

MZP bultuma Aizawl khawpui chhunga college students union hruaitute leh hnam pual zirlai hruaitute nimina ṭhukhawm chuan vawiin aṭangin Mizoram Subordinate Services Selection Board (MSSSB) Chairman pisa kai tur an dang dawn.

MZP chuan MSSSB hian tunhnaia an hna lakah hnamdang pathum an la tih tarlangin, "He thilah hian MSSSB Chairman nilai hi a mawhphurtuah leh hnam tana ding tawk loah meeting chuan ngaiin, a kaihhruaina hnuaia MSSSB hna lak awm zel tur chu ram leilung fate tan him tawk loah a ngai a, ban a nih ngei theih nana hmalak rêl a ni," an ti.

MSSB Chairman ban an phut chungchang hi MZP chuan Chief Minister leh Dy. Chief Minister hnenah an thlen a, January 2023 ral hma ngeia bantir turin an ngen a ni.

January 30, Thawhṭanni khan MZP hruaitute hi sorkar hotuten lengah sawmin, an thil phut chungchang hi an sawipui a ni. MZP chuan nimin chawhnu dar 2 thleng khan sorkar hmalakna an ngaichang a, an beisei anga hmalakna a awm loh avangin an ṭhukhawm nghal a, MSSSB Chairman pisa kai tur dan hi an rel a ni.

Meeting chuan, "MZP-in thuneitute hnenah January thla chhung ngeia MSSSB Chairman thlak tura ngenna a lo thlen tawh tihhhlawhtlin a ni lo hi hriatthiam har kan ti hle," an ti.

Meeting-a thurelte
■ February 1, 2023-ah MSSSB Chairman pisa kai tur dan
■ Thu dang a la awm loh chuan, February 2, 2023-ah MSSSB Chairman pisa kai tur dan chhunzawm tur
■ MZP-in sorkar a ngenna a la hlawhtlin loh chuan, February 3 hian Aizawl khawpui chhungah MSSSB Chairman ban ngiatin zirlaite kawngzawh huaihawt tur
■ Kal zel dan tur chu ngaihtuah a, la puanzar leh tur a ni ang.