Thei, thlai, pangpar leh mauah hausakna khawp thar turin Mizoramin theihna a nei - CM Zoramthanga

Chief minister Zoramthanga chuan, horticulture lam - thei, thlai, pangpar leh mau lamah Mizoramin hausak theihna khawp thar chhuak turin theihna a neih thu a sawi.

CM Zoramthanga hian nimin khan Mizoram Horticulture Service Association (MHSA)-in Tourist Lodge, Chaltlanga General Conference vawi 25-na an hman a hmanpuinaah thu sawiin, "Horticulture thar chhuah kan tih, thei, thlai, pangpar leh maute hi state economy tihhmasawn a, hausak theihna khawp thar chhuak tura theihna Mizoramin a nei a ni," a ti.

Horticulture lama theihna hâi chhuak turin kut hnathawktute kaihruaitu Horticulture department-in pawimawhna lian tak an neih thu sawiin Zoramthanga chuan, "Kan ram hi a nih theih ang ni turin kawng hrang hranga ramin malsawmna kan dawnte hi hai chhuak turin kan theihna zawn ṭheuhah thawk a, ram hmasawnna atan ṭhahnemngai taka thawh tlan a pawimawh," a ti a; inkhawmpui thupui 'Off season cultivation - harnessing the untapped potential' tih chu ṭha a tih thu a sawi.

Chief Minister chuan, Covid-19 lên laia Horticulture department-in thei leh thlai hralhna tur supply chain an siam chu fakin, agriculture leh horticulture lama eizawnna hlawhtlinna atan a pawimawh thu a sawi a; state páwna hralh chhuah tur leh hlâwk tham tur thar turin mihring thâ chauha innghat lo a, a remchang apianga kháwl hman leh mimal leh páwl anga hmalaknate a pawimawh tih a sawi bawk.

Inkhawmah hian Horticulture secretary K Lalthawmmawia pawhin thu sawiin, ṭhahnemngai taka thawk a, mipui rawngbawltu an nihna hre reng turin a chah a, "Sorkar hi kan ta a ni tih hre rengin, hlawh leh dan ang taka chanvo chan tur bak beisei loin, mi tin ban phâka awm a, awmna apianga rinawm leh rin tlakin sorkar hnathawk chu a awm tur a ni," a ti.

MHSA General Conference hi an president T Liankunga'n a kaihruai a, kum hnih chhunga an member thite sunna hun hman a ni. Inkhawmpui thupui 'Off season cultivation-harnessung the untapped potential' tih chu Thingdawla Centre of Excellence project officer PC Lalnghahsangi'n a sawi.

MHSA-ah hian member mi 58 an awm mek a ni.