Naupang huaisente lawmpui

Kumina Republic Day-ah Mizo naupang paliin India rama naupang huaisen chawi-mawina, National Bravery Award an dawng a; award dawngtute hi nimin khan Social Welfare & Tribal Affairs minister Lalrinawma'n a pisaah kâwmin, thingpui a inpui.

Mizoram State Council for Child Welfare (MSCCW) president ni bawk minister Lalrinawma chuan, Mizo naupang zingah India rama naupang huaisen chawimawina dawng thei an awm chu thinlung taka a lawm thu leh chawimawina dawngtute a lawmpui thu a sawi a; ram leh hnam tan mi chhuanawm leh entawn tlak ni zel tura chahin, duhsakna a hlàn.

Lalrinawma chuan, "Naupang rilru thianghlim takin mahni mihringpui chhanhimna atan nunna thàpa an thawk hi a ropui a, an thil tihin mi dangte chona a pe nasa hle a ni," a ti a; nu leh pate'n an fate ruihhlo laka fihlim tur leh huaisen inzirtir zel se a duh thu a sawi bawk.

National Bravery Award hi Covid-19 léng avangin kum hnih chhung sem a ni lo a, kumina Republic Day-ah khan kum 2021 leh kum 2022 chhunga huaisen chawi-mawina dawng tura thlante hnenah hlan niin, state 17-a naupang 56-in an dawng a ni.