Lokayukta report Governor-ah hlân; Lokayukta-ah thubuai 47 a lut tawh

Mizoram Lokayukta chairman C Lalsawta, IAS (Rtd) chuan nimin khan Governor Hari Babu Kambhampati hnenah Mizoram Lokayukta Annual Report 2021-2022 a hlân a, an inkâwm nghal. Mizoram Lokayukta-ah thubuai 47 ziah luh a ni tawh tih tarlan a ni.

Mizoram Lokayukta Act, 2014 Section 47-in a phût angin Lokayukta annual report siam ṭhin a ni a, nimina C Lalsawta'n Governor hnena report a thehluh hi annual report pathumna a ni. Report hian April 1, 2021 leh March 31, 2022 inkar a huam a, Mizoram Legislative Assembly-ah la pharh leh tur a ni.

C Lalsawta chuan, Mizoram Lokayukta dinhmun leh hmalakna tlangpui Larsap a hrilh a; Mizoram Lokayukta-in hmunhma leh bungrua a la neih ṭhat tâwk loh thu te, thawktu mamawh zat an la neih loh thu te, indaih lo deuh mahse tluang takin hna an thawh ve zel thute a sawi. Lokayukta case ṭhenkhatte leh a dinhmunte a hrilh bawk.

Tarlan danin, January 31, 2023 thleng khan Mizoram Lokayukta-ah thubuai 47 ziah luh a ni tawh a, thubuai 16 chinfel tawh niin, thubuai kal mek 31 a awm. Thubuai awm mek zinga 11 chu preliminary enquiry tih turin a inchiah mek a, thubuai 16 chu chhui zui turin ACB kutah a awm mek a ni.