EAF vbc. 1,000 hmanna tur kan duang mek - Robert Romawia

Tourism minister Robert Romawia Royte chuan nimin khan Thenzawl Auditorium thar a hawng. Minister chuan, Mizoramin External Aided Fund cheng vbc. 1,000 a thuphungin a hmuh tawh thu leh a hmanna tur duan mek a nih thu a sawi.

Robert Romawia chuan, Tourism department-in mumal takin Responsible Tourism Policy, Rules leh Act-te behchhanin hmasawnna hnathawhna tur sumte sorkar laipui aṭanga an hmuh zel thu a sawi a, "Tunah hian External Aided Fund cheng vbc. 1,000 zet a thuphungin kan hmu tawh a, a hmanna tur kan duang chho mek a ni," a ti.

Thenzawl Auditorium sak bulṭantu bialtu MLA hmasa Lal Thanhawla chungah a lawm thu sawiin Minister chuan, "Kan CM Pu Zoramthanga'n 'Sorkar hmasate bul lo ṭan tawh hmasawnna hna ṭhate kan chhunzawm zel dawn' tia a lo sawi ṭhin tihhlawhtlinna a ni a, golf course-te pawh a ni," a ti a; sorkar hmasa bul ṭan tawh thil dang tam tak an tihhlawhtlin thu a sawi.

Robert Romawia chuan, Thenzawl chu a hmunhma a rem hle tih sawiin, "Tun hnaia kan hawn Golf Course, Wellness & Spa Centre leh Auditorium changkangte bakah hian thil ṭha tak tak dang a la rawn kal zel dawn a, a bul kan la ṭan chauh zawk a ni," a ti. Minister hian Thenzawl Badminton Club hnenah court chhuat (carpet) leh Thenzawl Higher Secondary School hnenah football leh goal net a pe a ni.

Thenzawl Auditorium hi cheng nuai 918 sênga sak a ni a, contractor chu Zothankhuma, Zotlang, Aizawl a ni.