MSU-in Delhi-ah punkhawm an huaihawt

Mizo Students' Union (MSU) Gen. Hqrs chuan January 30, Thawhṭanni khan Jantar Mantar, New Delhi-ah peaceful demonstration (Delhi Chalo, Delhi Jaggo) an huaihawt a, an thil phût hrang hrangte an puang.

Punkhawmah hian mi 1,000 chuang an tel a, MSU treasurer Zodinsanga'n kaihruaiin, president Samuel Zoramthanpuia'n thu a sawi. Indian Constitution Preamble an chhiar chhuak bawk.

MSU president Zoramthanpuia chuan, Mizote chu Indian an nih thu sawiin, India ram mipuiin an hriat ve a ṭul thu a sawi a, "India sorkar hian nasa zawka Mizote a ngaihsak a ṭul," a ti. Mizo-Chin-Kuki tihte chu ṭobul inang, thlahtute leh nunphung inang an nih thu sawiin, "Kan unaute rambuai vanga rawn pémte hi lo pawm turin India kan phût a ni," a ti.

MSU President chuan, Myanmar lama Mizo, himna zawnga Mizorama lutte'n India páwna zin theihna tur exit permission pawm turin India sorkar an phût thu leh, India chu democracy ram lian ber a nih angin, Myanmar ramin democracy a neih theih nan thlâwp tura India an phût thu a sawi bawk.