Hna ruak hriatna tur EmpEx hawn a ni

Labour, Employment, Skill Development & Entrepreneurship (LESDE) minister Lalchhandama Ralte chuan nimin khan a pisaah hna dil tumte leh hna ruak neite tana awlsam zawka inziah luh leh inhriattirna tur Employment Exchange (EmpEx) portal a hawng.

Lalchhandama Ralte chuan, sorkar department bakah, sorkar hnuaia corporation-te'n an hman ṭangkai turin hmalak zel a ṭul thu a sawi a, "LESDE department-in skill development-ah nasa takin hna a thawk a, India mai ni lo, khawvel huap pawha pho chhuah tlakin hna a thawk a, entrepreneurship lamah pawh department hmalakna hi a ropui hle a ni," a ti.

Mizoram Youth Commission-in hnathawh tur neite leh thawk duhte hman tur portal an siam tawh thu sawiin Minister chuan, "Ṭangkai taka hman a ni tawh a, tunah hian portal changtlung zawk siam a ni leh ta a ni," a ti a; portal thar chu ṭhalai hna zawng mekte'n an hlâwkpui dawn thu a sawi.

EmpEx portal hi LESDE department leh ICT department hnuaia MSeGS ṭangkawpin an siam a ni.