Rângva semna tur scheme hawng

Lengteng bialtu MLA Dr L Thangmawia chuan, nimin khan a biala Kawlkulh khuaah rângva in la nei lote neihtir vekna tur, Hlunsanga Malsawmna Scheme a hawng a; scheme bul ṭan nan Rural Development minister Lalruatkima'n rangva ṭhahnem tak a ruahman thu a sawi.

Dr L Thangmawia chuan, tuna in ding lai, a chung rangva la ni lote chu pek hmasak tur, phase I-ah dah a nih thu sawiin, "Ngopa BDO leh Khawzawl BDO-in survey an neihah Lengteng biala in ding lai 28 chu rangva in chung la nei lo an ni," a ti a, party thliar loin hmalak nghal a nih tur thu leh kum 2023 chhungin phase-I zawh hman tum a nih thu a sawi bawk.

Hnam tinin an hnam zalenna atana beitute an ngai hluin an chawimawi fo ṭhin tih sawiin Lengteng bialtu MLA chuan, "Mah se, khawvel history-ah hian zalenna sual hlawhtling hi an tlem fe zawk. Zofate pawhin independence kan sual mai ni loin independence kan puang a, chu indepen-dence puannaa hming sign tute zinga mi Pu Hlunsanga(L) in sak la ding ngeia hun kan hmang thei hi a lawmawm tak zet a ni," a ti.