Sorkar hotute thu MZP-in pawm thei lo; MSSSB Chairman an dang zui zel dawn

2nd February, 2023

MZP bultumin nimin khan Aizawla zirlaite'n Mizoram Subordinate Services Selection Board (MSSSB) chairman Ramhmangaiha Ralte pisa kai tur dang turin an pungkhawm a, vawiinah an dang leh dawn.

MZP hruaitute chu Mizoram sorkara hotute'n nimin khan an kâwm a, MSSSB Chairman dan chu chhunzawm tawh lo turin an ngen. Sorkar hotute'n an ngenna hrang hrangte chu MZP hruaitute chuan an sawiho hnuah, MSSSB Chairman dang chhunzawm turin thutlukna an siam a ni.

Nimin zing dar 8:30 vel aṭang khan MSSSB Chairman pisa kai tur dang turin Secretariat Complex main building gate bulah zirlaite an pungkhawm a; Zo fate chanvo hauh ngam lo sorkar official an duh loh thu leh MSSSB Chairman báng tura an phût thutein an au rual. MSSSB Chairman chu pisa kai a tum loh avangin buaina awm loin zirlaite chu chhun dar 11:30 velah an ṭin darh.

MZP president Lalnunmawia Pautu chuan, "He kan hmalakna hi kan chhehvela hnam dangte kan huat vang a ni loa, a ram leilung faten kan chanvo dik tak hmuh hi kan duh mai chauh a ni. Tunah hian kan chanvo hi chhuhsakin kan awm mai piah lamah, Mizo zirlaite chanvo hi official ṭhenkhatten hnam dang an barh a ni," a ti.

MZP hruaitute chu nimin khan School Education minister Lalchhandama Ralte-in a kâwm a; tlai lamah deputy chief minister Tawnluia hoin minister Lalchhandama Ralte, DPAR secretary R Lalramnghaka leh deputy secretary H Lalrinpuia te nen an inkâwm leh a ni.

Inkawmnaah hian sorkar thuneitute chuan thu ken an nei a, an thu kente chu pawm tur leh MSSSB Chairman dan titawp turin an ngen a ni. Sorkar hotute ngenna chu MZP hruaitute chuan an sawiho leh hnuah an pawm thei lo a, MSSSB Chairman chu vawiinah dan chhunzawm an tum a; an thil phût a la hlawhtlin loh chuan naktukah Aizawlah kawngzawh an huaihawt dawn.

Tarlan tawh angin, tun hnaia MSSSB-in hna an lakah hnam dang pathum an tling a, chu chu duh loin MZP chuan MSSSB Chairman chu January 2023 ral hmaa bàn an phût a, an thil phût chu January 20 khan Chief Minister leh Deputy CM hnenah an thlen a ni.

MZP hruaitute sawi danin, a hma pawhin MSSSB hian hnam dang an la tawh a, chumi ṭum chuan MSSSB Chairman an dâwr tawh. A ṭum hnihna atana hnam dang lak an ni leh chu hriatthiam har an ti a, bang turin an phut ta a ni.