Champhai College zirlaite lungawi loin an pungkhawm

Champhai College zirlaite chuan an college-a Commerce subject building sak hna kal mek muang lutuk vanga an lungawi lohna lantir nan leh chak zawka sa tura sorkar phût nan nimin khan Champhai khawpuia Darthangvunga Traffic Point bulah sit-in demonstration huai­hawtin an pungkhawm.

Champhai aṭanga thu dawn danin, Champhai College Students Union hruaitute'n a hmaa thu­chhuah an lo siam tawhah, September 2019-a sak ṭan Commerce building, tun thlenga sak zawh a la ni lo chu pawi an tih thu an tarlang a; Rashtriya Uchchatar Shiksha Abhiyan (RUSA) aṭanga sum hmuh hmanga in chhâwng thum chauh satu contractor Skyridge hnathawh danah an lungawi loh thu an sawi.

Champhai College SU chuan, Commerce buil­ding chu sak chhunzawm leh a nih hma chuan college zirlaite'n kawng chi hrang hrangin an lungawi lohna lantir an tum thu an puang a; in satute'n rawng hnawih leh electric wiring zo loin hna an chawlhsan thu an sawi bawk.