CM-in Mobile Veterinary Unit a vailiam

Chief minister Zoramthanga chuan nimin khan Selesiha Vety College khelmualah thingtlanga ran damlo enkawl theihna tur lirthei, Mobile Veterinary Unit (MVU) 26 a vailiam a, Mizorama RD block tinah dah a ni dawn.

CM Zoramthanga chuan, ran vulh chu economy tiṭhang liantu pawimawh a nih thu sawiin, "Sa, bawnghnute leh thil dang kan hmuhna hnár ran vulhte leh ṭhenkhat tan chuan chhungkaw member ang hiala kan en kan ran vulhte hriselna ngaih pawimawh a ngai. Ran hriselna leh enkawl kawngah hmasawn zel a ṭul," a ti.

Tarlan danin, Mobile Veterinary Unit hi Livestock Health and Disease Control Scheme hnuaia Establishment and Strengthening of Veterinary Hospitals and Dispensaries (ESVHD) aṭanga hmuh a ni a; sorkar laipuiin Mizorama RD block tina dah turin 26 a rawn pe a ni.

MMU hi pakhatRs 16,00,000 man niin, sorkar laipuiin a tum vek a, a leina atan sorkar laipui chuan Mizoram hnenah kum 2021-22 khan Rs 4,16,00,000 a rawn pe.

MVU pakhat enkawl nan kum khatah Rs 18,72,000 ruahman a ni a, enkawlna senso chu sorkar laipuiin 90% leh Mizoram sorkarin 10%-in an intum sem dawn a ni. MVU pakhatah vety doctor, paravet leh driver pakhat ṭheuh an awm ang.

AH&Vety additional director Dr Lalhmingliana chuan, ran hriselna leh mihring hriselna a inzawm tih sawiin, "Mihringa natna thlentu natna hrik zinga 60% hi ran aṭanga lo chhuak a ni a, natna la awm ngai lo, tun hnaia lo lang chhuak thar zinga 75% chu mihringin ran leh ramsa aṭanga a kai chhàwn vek a ni," a ti a; ran hriselna ngaih pawimawh a ṭul thu a sawi.

MVU vailiamna inkhawmah hian AH&Vety minister Lalrinawma, MLA panga - C Lalmuanpuia, Dr ZR Thiamsanga, Ramthanmawia, Zothantluanga leh K Laldawngliana te, AH&Vety secretary Lalzarmawii, director Dr Lalrinpuii Sailo leh mi pawimawh dangte an tel a ni.